- 440 -

1409. Aug. 15. Liegnitz.

Herzog Wenzel, Bischof zu Breslau, verleiht den liegnitzer Bürgern das Rechte dass sie Landgüter zu Erbe und Lehn kaufen können und ihnen solche ohne Beschwerde geliehen und gereicht werden sollen.

In gotis namen amen Wir Wenczlaw der ander, bischoff czu Breslaw, in Slesien herczog vnd herre czu Legnicz vnd czum Goltperge bekennen vnd thun kunth ewiclichen mit desem brife allen den, dy en sehon adir horen lesen, daz wir haben angesehen manchfeldige grose getrewe dinste, dy vnser getrawen liben ratmannen, scheppfen, geswornen, eldisten der ganczen stad czu Legnicz dem hochgebornen fursten vnd herren herczoge Ruprecht herren czu Legnicz vnsirm liben bruder seligis gedechtniss vil vnd dicke in seinen schulden zu hulfe komen sein vnd douon gelediget vnd gefreiet haben, als wir des wol vnderweyset sein vnd auch durch getrawer dinste willen, dy sie vns zu vnsern noten gethan haben vnd noch wol thun mogen vnd sullen vnd haben von vnser wegen vnd alle vnser nachkomen wegen erbherren zu Legnicz vnd czum Goltperge von furstlichen gnaden mit rate vnser getrawen eldisten czu sunderlichen genaden gegeben, benumen, lihen, reichen, gelihen vnd gereicht haben den obgenanten ratmannen, schepfen, eldisten vnd kaufflewten vnd burgern der stad czu Legnicz, dy do yczund sein adir in czukunfftigen czeyten do werden sein, waz sy lehnguter adir czu erbrechte guter adir czu eygenem rechte guter in vnsirm lande kewffen adir kewfen werden, das wir yn vnd eren nachkomen burgern doselbist von vnsir wegen vnd vnsir obgenanten nachkomen erphern czu Legnicz vnd czum Goltperge wegen dy selben guter ane beswernisse wollen lihen, reichen czu denselbin rechtin, als sie von aldirs gelegin sein. Des czu einer sicherheit haben wir mit rechten wissen disen briff mit vnserm grosen ingesigel mit vnsirm signet hindene angedrukt lassen vorsigiln czu Lignicz nach gotis geburd vnsirs liben hern virczenhundirt jare darnach im newenden jare an vnsir liben frawen tag wurczewey. Dobey sein vnsir liben getrawen gewest her Hannos Czedelicz von Parchewicz, her Hannos Ryme, Hannos Gawen, Hannos Rotkirche der eldiste, Petir Guske, Hannos Langenaw vnd Johannes Alczenaw, dem desir briff befolen wart czu schreyben.

Bitschens Privilegb. f CXVIIb. — Die Schrift des O. d. St. L. No. 227 ist theils abgesprungen, theils durch Flecken entstellt; das an Schnüren von rother Seide hängende Siegel ist zerbrochen.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866